轉工會影響永住申請？
投稿日：2025年7月31日
大家好，我係Visa Team廣東話對應嘅Matt。
好多朋友喺日本打工，拎住嘅係「技術・人文知識・國際業務」呢類工作簽證。唔少人以為轉工好簡單，只要搵到新公司、順利入職就搞掂，但其實入管局嘅要求唔係咁簡單。
根據日本入國管理局嘅規定，只要你轉咗工，無論職位係咪同之前差唔多（例如都係做會計、IT、貿易等等），都必須向入管局申報你嘅工作內容有無變更。如果你唔提交，入管局有可能會視為你未經許可就從事新工作，變相等同你違反簽證條件。呢種情況下，日後你想申請永住，或者其他簽證，就好大機會被拒。嚴重嘅話，連簽證更新都有風險。
其實依家入管局已經支援網上申請，整個程序相對簡單同方便，唔需要親身去辦、亦唔使排長龍。所以千祈唔好貪方便唔理，最後出事就得不償失。
仲有，好多人以為，只要新公司人工高啲、條件好啲，永住就更加容易批。但現實係，如果你喺永住審查期間轉工，就算轉工後條件更好，入管局都會視為你「生活基礎未穩定」，所以好有可能會影響許可成功率。
所以我哋一般都建議，如果你已經申請緊永住，最好喺審查期間唔好隨便轉工。如果真係有需要轉工，一定要事前諮詢專業人士，並盡快完成相關申報手續，以免影響到申請結果。
關於任何永住又或者就勞簽證嘅問題，歡迎隨時向我地詢諮詢！
Matt
